കനത്ത മഞ്ഞിൽ ദിശയറിയാതെ ഇടുക്കി കൈലാസഗിരി മലയിൽ കുടുങ്ങിയ നാല് യുവാക്കളെ ഫയർഫോഴ്സ് സംഘം രക്ഷപെടുത്തി. സമുദ്രനിരപ്പിൽ നിന്ന് ഏകദേശം 4000 അടി ഉയരമുണ്ട് കൈലാസഗിരി മലനിരകൾക്ക്. ഇവിടെ നിന്നും കാണുന്ന കാഴ്ച മനോഹരമായതുകൊണ്ട് തന്നെ നിരവധി ആളുകളാണ് ഇവിടെ എത്തുന്നത്. അങ്ങനെ എത്തിയതാണ് കാഞ്ഞിരപ്പിള്ളിയിലെ ചെറുവള്ളിക്കടുത്ത് കാവുംഭാഗം സ്വദേശികളായ അനന്തു ബാലകൃഷ്ണൻ, വിനായകൻ, ശ്രീലാൽ , ജയദേവ് എന്നിവർ. കാഴ്ചകണ്ട് 6 മണിയോടെ മല ഇറങ്ങാൻ തുടങ്ങിയപ്പോഴേക്കും മഞ്ഞ് വന്ന് മൂടുകയായിരുന്നു. ഒന്നും തന്നെ കാണാൻ പറ്റാത്ത അവസ്ഥ ആയതിനാൽ എതിർദിശയിൽ നാലംഗസംഘം 2 കിലോമീറ്ററോളം നടന്നു. രാത്രി 7 മണിയോടെ പീരുമേട് ഫയർ ഫോഴ്സിനെ ബന്ധപ്പെട്ട് സഹായം അഭ്യർത്ഥിക്കുകയായിരുന്നു. 9 മണിയോടെ ഇവിടെ എത്തിയ രക്ഷാപ്രവർത്തകർ 4 പേരെയും രക്ഷപെടുത്തി പോലീസിനു കൈമാറി.