കൊച്ചി മുനമ്പത്ത് വള്ളം മറിഞ്ഞു കാണാതായ ഒരു മൽസ്യത്തൊഴിലാളിയുടെ മൃതദേഹം കണ്ടെത്തി. വൈപ്പിൻ സ്വദേശി ശരത്തിൻ്റെ മൃതദേഹമാണ് കണ്ടെത്തിയത്. ഇനി കണ്ടെത്തേണ്ട മൂന്ന് പേർക്കായി തിരച്ചിൽ തുടരുകയാണ്. 25കാരനായ ശരത്തിൻ്റെ മൃതദേഹം രാവിലെ അഴീക്കോടാണ് കണ്ടെത്തിയത്. തിരച്ചിലിനിടെ 5 നോട്ടിക്കൽ മൈൽ ഉൾക്കടലിൽ മൃതദേഹം കണ്ടത്. രാജു മോഹനൻ ഷാജി എന്നിവരുടെ മൃതദേഹമാണ് ഇനി കണ്ടെത്താനുള്ളത്.
വ്യാഴാച വൈകീട്ട് 5 മണിയോടെയാണ് 7 അംഗ മൽസ്യത്തൊഴിലാളികൾ അപകടത്തിൽപെട്ടത്. ആനന്ദൻ, ബൈജു, മണിയൻ എന്ന മൂന്നു മൽസ്യത്തൊഴിലാളികളെ രാത്രിയോടെ തന്നെ രക്ഷപെടുത്താൻ കഴിഞ്ഞെങ്കിലും 4 പേരെ കാണാതാവുകയായിരുന്നു. രക്ഷാപ്രവർത്തനം വൈകിയെന്ന് മത്സ്യത്തൊഴിലാളികളും കുടുംബങ്ങളും പരാതിപ്പെട്ടു. എന്നാൽ കടൽ പ്രക്ഷുബ്ധമായതാണ് രക്ഷാപ്രവർത്തനത്തിന് ബുദ്ധിമുട്ടുണ്ടാക്കുന്നതെന്നും വീഴ്ചയുണ്ടായിട്ടില്ലെന്നുമാണ് ഫിഷറീസ് മന്ത്രി സജി ചെറിയാൻ പറഞ്ഞത്.
