ട്രാക്ടറിന്റെ സീറ്റ് കവർ കീറിയ തെരുവുനായയെ മഹാരാഷ്ട്ര സ്വദേശി അതിക്രൂരമായി തൂക്കിക്കൊന്നു. മഹാരാഷ്ട്രയിലെ പരോളയിലാണ് സംഭവം. സംഭവത്തിന്റെ വീഡിയോയും സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. കഴുത്തിൽ കയർ കെട്ടി വാഹനത്തിൽ തൂക്കിയിട്ടാണ് നായയെ ഇയാൾ കൊന്നത്. നാട്ടുകാരാണ് വീഡിയോ ചിത്രീകരിച്ചത്. ആദ്യം ഇൻസ്റ്റഗ്രാമിൽ പ്രത്യക്ഷപ്പെട്ട വീഡിയോ പിന്നാലെ മറ്റ് സോഷ്യൽ മീഡിയ പ്ലാറ്റ്ഫോമുകളിലുമെത്തി.
സംഭവം ഇതിനകം തന്നെ സൈബർ ലോകത്ത് ചർച്ചാ വിഷയമായി മാറിയിട്ടുണ്ട്. ഇത്തരം സംഭവങ്ങൾ രാജ്യത്ത് അരങ്ങേറുന്നതിനെക്കുറിച്ചുള്ള ആശങ്കകളും പലരും പങ്കുവെയ്ക്കുന്നുണ്ട്. ‘മൃഗങ്ങളെ ദ്രോഹിക്കുന്ന മനുഷ്യരെ നമ്മൾ ശിക്ഷിക്കുന്നുണ്ടോ? എല്ലാ ജീവജാലങ്ങളെയും തുല്യരായി നമുക്ക് കാണാൻ കഴിയുമോ” , എന്നാണ് ഒരാൾ വീഡിയോക്കു താഴെ കുറിച്ചത്. “ആ വ്യക്തിക്ക് ഇപ്പോഴും നാണമില്ല. ചെയ്ത തെറ്റ് എന്താണെന്ന് പോലും അയാൾക്ക് മനസിലാകുന്നില്ല”, എന്ന് മറ്റൊരാൾ കുറിച്ചു.