കൊളംബോ: പ്രേമദാസ സ്റ്റേഡിയം ഹോം ഗ്രൗണ്ട് പോലെയാണെന്ന് വിരാട് കോഹ്ലി ഞായറാഴ്ച വീണ്ടും തെളിയിച്ചു. ഈ ഗ്രൗണ്ടിൽ തുടർച്ചയായ നാലാം സെഞ്ചറി നേടിയാണ് ഏകദിനത്തിലെ 13,000 റൺസെന്ന നാഴികക്കല്ല് കോഹ്ലി പിന്നിട്ടത്. ഇതിൽ 3 ഇന്നിങ്സുകളിലും കോഹ്ലി നോട്ടൗട്ടായിരുന്നു. രാജ്യാന്തര ഏകദിനത്തിൽ 13,000 റൺസ് തികയ്ക്കുന്ന അഞ്ചാമത്തെ താരമാണ് കോലി. ഇന്നലെ കോഹ്ലി അടിച്ചെടുത്ത മറ്റ് റെക്കോർഡുകൾ.
ഏകദിനത്തിൽ 13,000 റൺസ് തികച്ച കോഹ്ലി കുറഞ്ഞ ഇന്നിങ്സിൽ ഈ നേട്ടം കൈവരിക്കുന്ന താരമായി. 267 ഇന്നിങ്സുകളിൽ നിന്നാണ് കോഹ്ലി ഈ നേട്ടം സ്വന്തമാക്കിയത്. 321 ഇന്നിങ്സുകളിൽ നിന്ന് 13,000 റൺസ് തികച്ച സച്ചിൻ ടെണ്ടുൽക്കറുടെ റെക്കോർഡാണ് മറികടന്നത്. ഏകദിനത്തിൽ 8,000 മുതൽ 13,000 റൺസ് വരെ എല്ലാ നാഴിക്കല്ലുകളും വേഗത്തിൽ പിന്നിട്ടതിന്റെ റെക്കോർഡ് കോഹ്ലിക്കാണ്.
ഏകദിനത്തിൽ 47ാം സെഞ്ചുറി പൂർത്തിയാക്കിയ കോഹ്ലി കൂടുതൽ സെഞ്ചുറി നേട്ടത്തിൽ സച്ചിനുമായുള്ള അകലം രണ്ടാക്കി കുറച്ചു. 49 സെഞ്ചുറികളാണ് സച്ചിന്റെ ബാറ്റിൽ നിന്ന് പിറന്നത്. 30 സെഞ്ചുറികളുമായി റിക്കി പോണ്ടിങ്ങാണ് മൂന്നാമത്.
