സെർച്ച് വാറണ്ട് ലഭിച്ച ശേഷം നിയമാനുസൃതമായ രീതിയിൽ വീട് പരിശോധിക്കാൻ ഖാൻ സർക്കാരിനോട് ആവശ്യപ്പെട്ടതായി പിടിഐ റിപ്പോർട്ട് ചെയ്തു.
ഇമ്രാൻ ഖാൻ അഭയം നൽകിയിരിക്കുന്ന തീവ്രവാദികളെ അറസ്റ്റ് ചെയ്യാൻ പോലീസ് ഇന്ന് ലാഹോറിലെ വസതിയിൽ പരിശോധന നടത്തും. തീവ്രവാദികളെ കൈമാറാനുള്ള സർക്കാരിന്റെ 24 മണിക്കൂർ സമയപരിധി അവസാനിച്ചതോടെയാണ് പുതിയ നീക്കത്തിന് പോലീസ് പദ്ധതി ഇടുന്നത്. ഇതിന് മുന്നോടിയായി ഇന്നലെ വൻതോതിൽ പഞ്ചാബ് പോലീസ് ഉദ്യോഗസ്ഥർ ഇമ്രാൻ ഖാന്റെ വീട് വളഞ്ഞിരുന്നു.
ഭീകരരെ കൈമാറാനുള്ള സമയപരിധി പാലിക്കുന്നതിൽ പാക്കിസ്ഥാൻ തെഹ്‌രീകെ ഇൻസാഫ് (പിടിഐ) തലവൻ പരാജയപ്പെട്ടതിനാൽ ഖാന്റെ സമാൻ പാർക്കിലെ വസതിയിൽ പോലീസ് നടപടി എപ്പോൾ വേണമെങ്കിലും പ്രതീക്ഷിക്കാമെന്ന് താൽക്കാലിക പഞ്ചാബ് സർക്കാർ പറയുന്നു. മെയ് 9 ന് സൈനിക കേന്ദ്രങ്ങൾക്ക് നേരെയുണ്ടായ ആക്രമണത്തിൽ പങ്കുണ്ടെന്ന് സംശയിക്കുന്ന എട്ട് പേരെ സമാൻ പാർക്ക് പ്രദേശത്ത് നിന്ന് അറസ്റ്റ് ചെയ്തതായി മുതിർന്ന പോലീസ് ഓഫീസർ ഹസൻ ഭാട്ടി അവകാശപ്പെട്ടു.
കനത്ത യന്ത്രങ്ങളുമായി പോലീസ് ഉദ്യോഗസ്ഥർ സമാൻ പാർക്കിന് സമീപം നിലയുറപ്പിച്ചിട്ടുണ്ട്. ഖാന്റെ വസതിയിലേയ്‌ക്കുള്ള എല്ലാ റോഡുകളും പോലീസ് തടസ്സങ്ങൾ സ്ഥാപിച്ച് തടഞ്ഞു. പ്രദേശത്ത് ജാമറുകളും സ്ഥാപിച്ചിട്ടുണ്ട്. പഞ്ചാബ് പോലീസിന്റെ ഇൻസ്‌പെക്ടർ ജനറലും (ഐജി) തലസ്ഥാന നഗര പോലീസ് ഓഫീസർമാരും “ജാഗ്രതയോടെ” തുടരാൻ പോലീസിനോട് ആവശ്യപ്പെട്ടതായി ജിയോ ന്യൂസ് റിപ്പോർട്ട് ചെയ്തു.
ഖാന്റെ സമാൻ പാർക്കിലെ വസതിയിൽ 30 മുതൽ 40 വരെ ഭീകരർ ഒളിച്ചിരിക്കുന്നതായി ബുധനാഴ്ച പഞ്ചാബ് ഇൻഫർമേഷൻ മന്ത്രി അമീർ മിർ അവകാശപ്പെട്ടു. അവരെ 24 മണിക്കൂറിനുള്ളിൽ കൈമാറണമെന്നും അല്ലെങ്കിൽ കർശന നടപടി നേരിടേണ്ടി വരുമെന്നും മുഖ്യമന്ത്രിക്ക് അന്ത്യശാസനം നൽകി. സമയപരിധി അവസാനിച്ചതിനാൽ ഖാന്റെ അനന്തരവൻ ഹസൻ നിയാസി ഉൾപ്പെടെയുള്ള ഭീകരരെ പിടികൂടാൻ സമാൻ പാർക്കിൽ പോലീസ് റെയ്ഡ് നടത്തിയേക്കുമെന്ന് മന്ത്രി ഇന്നലെ വ്യക്തമാക്കി. എന്നാൽ സെർച്ച് വാറണ്ട് ലഭിച്ച ശേഷം നിയമാനുസൃതമായ രീതിയിൽ വീട് പരിശോധിക്കാൻ ഖാൻ സർക്കാരിനോട് ആവശ്യപ്പെട്ടതായി പിടിഐ റിപ്പോർട്ട് ചെയ്തു.
