18 കോടി ബാലറ്റുകൾ…വോട്ടെണ്ണാൻ 50,000 പേർ, 650 നിരീക്ഷകർ…1,200 കൗണ്ടിംഗ് സെന്ററുകൾ…നിസാരമല്ല ഈ വോട്ടെണ്ണൽ പ്രക്രിയ. ( vote counting process explained )
18.34 കോടി വോട്ടർമാരാണ് ഉത്തർപ്രദേശ്, പഞ്ചാബ്, ഉത്തരാഖണ്ഡ്, ഗോവ, മണിപ്പൂർ എന്നീ സംസ്ഥാനങ്ങളിലായി വോട്ട് രേഖപ്പെടുത്തിയിരിക്കുന്നത്. ഇത്രയധികം വോട്ടുകൾ എങ്ങനെയാണ് എണ്ണിത്തീർക്കുന്നതെന്ന് ചിന്തിച്ചിട്ടുണ്ടോ ? ആ പ്രക്രിയ അറിയാം…
സമയം 6 മണി
വോട്ടെണ്ണുന്നതിനായി നിയോഗിച്ച ഉദ്യോഗസ്ഥർ ഡ്യൂട്ടിക്കായി റിപ്പോർട്ട് ചെയ്യും.
സമയം 6.45- 7 മണി
സ്ഥാനാർത്ഥികൾ, പൊതുനിരീക്ഷകർ എന്നിവരുടെ സാന്നിധ്യത്തിൽ സ്‌ട്രോങ്ങ്‌റൂമുകൾ തുറക്കും.
സമയം 8 മണി
പോസ്റ്റൽ ബാലറ്റുകൾ എണ്ണിത്തുടങ്ങും
സമയം 8.30
ഇലക്ട്രോണിക് വോട്ടിംഗ് മെഷീനിലെ വോട്ടുകൾ എണ്ണി തുടങ്ങും
ഇവിഎം വോട്ടെണ്ണൽ :
-ഓരോ മണ്ഡലത്തിലും ഒരു നിരീക്ഷകൻ ഉണ്ടാകും
-സ്‌ട്രോങ്ങ് റൂമിൽ നിന്ന് അകത്തേക്കും പുറത്തേക്കും വോട്ടിംഗ് മെഷീനുകൾ കൈമാറാൻ ഒരു ഡിസ്ട്രിബ്യൂഷൻ ഓഫിസറെ ചുമതലപ്പെടുത്തിയിരിക്കും.
-വോട്ടെണ്ണുന്ന സ്ഥലത്തെ ഓരോ ടേബിളിലും ഒരു കൗണ്ടിംഹ് സൂപ്പർവൈസറും (ഗസറ്റഡ് ഓഫിസർ), രണ്ട് കൗണ്ടിംഗ് അസിസ്റ്റന്റുമാരും, ഒരു മൈക്രോ ഒബ്‌സർവറും ഉണ്ടാകും. പോസ്റ്റൽ ബാലറ്റ് ടേബിളിൽ രണ്ട് മൈക്രോ ഒബ്‌സർവർമാർ ഉണ്ടാകും.
-പ്രത്യേകം സജ്ജീകരിച്ചിരിച്ചിരിക്കുന്ന ടേബിളിലായി രണ്ട് അഡീഷ്ണൽ മൈക്രോ ഒബ്‌സർവർമാർ ഉണ്ടാകും. വോട്ടെണ്ണലിന്റെ ഓരോ റൗണ്ടും ഇവർ നിരീക്ഷിച്ച് ജനറൽ ഒബ്‌സർവറിന് റിപ്പോർട്ട് നൽകും.
-വോട്ടിം മെഷീനിലെ റിസൾട്ട് ബട്ടനിൽ അമർത്തുന്നതോടെ ഓരോ സ്ഥാനാർത്ഥിയുടേയും അതത് പോളിംഗ് സ്‌റ്റേഷനിലെ വോട്ടുകൾ തെളിഞ്ഞ് വരും.
-ഈ സംഖ്യ കൗണ്ടിംഗ് സൂപ്പർവൈസറും കൗണ്ടിംഗ് അസിസ്റ്റന്റും രേഖപ്പെടുത്തുകയും ഇത് റിട്ടേണിംഗ് ഓഫിസർക്ക് കൈമാറുകയും ചെയ്യും.
-റിട്ടേണിംഗ് ഓഫിസർ ഓരോ റൗണ്ട് വോട്ടെണ്ണലിന്റെ റിസൾട്ടുകളും കൂട്ടിച്ചേർത്ത് ഹാളിലെ വെള്ള ബോർഡിൽ എഴുതും. ഒപ്പം തെരഞ്ഞെടുപ്പ് കമ്മീഷന്റെ വെബ്‌സൈറ്റിലും ഈ സംഖ്യ കാണാൻ സാധിക്കും. ഓരോ മണ്ഡലത്തിലേയും അവസാന റിസൾട്ട് പോസ്റ്റൽ ബാലറ്റ് കൂടി എണ്ണിത്തീർത്ത് അതുകൂടി ചേർക്കാതെ പ്രഖ്യാപിക്കില്ല. ഒരു റൗണ്ട് വോട്ടെണ്ണലിന് ഏകദേശം 15 മിനിറ്റ് എടുക്കുമെന്നാണ് കണക്ക് കൂട്ടൽ.
