പാലക്കാട്: ചാർജ് ചെയ്യാൻ വച്ചിരുന്ന മൊബൈൽ ഫോൺ പൊട്ടിത്തെറിച്ച് മുറി കത്തിനശിച്ചു. കഴിഞ്ഞ ദിവസം രാത്രി ഏഴ് മണിയോടെ പാലക്കാട് പൊൽപ്പുള്ളിയിലാണ് സംഭവം. പൊൽപ്പുള്ളി വേർ‌കോലി ബി ഷാജുവിന്റെ ( 40 ) വീട്ടിലാണ് അപകടമുണ്ടായത്. ദിവസങ്ങൾക്ക് മുമ്പ് സുഹൃത്ത് വാങ്ങി ഉപയോഗിക്കാൻ നൽകിയ മൊബൈൽ ഫോൺ ആണ് പൊട്ടിത്തെറിച്ചത്.
പനിയായി കിടപ്പിലായിരുന്ന ഷാജു തലനാരിഴയ്‌ക്കാണ് രക്ഷപ്പെട്ടത്. ഫോൺ ചാർജ് ചെയ്യാനായി മകൻ മുറിയിലെത്തിയ ശബ്ദം കേട്ടാണ് ഇയാൾ ഉണർന്നത്. തുടർന്ന് മുറിയുടെ വാതിലടച്ച് മകനോടൊപ്പം പുറത്തേക്ക് പോയി. അൽപ്പസമയത്തിന് ശേഷം പൊട്ടിത്തെറിയുടെ ശബ്ദം കേട്ട് വാതിൽ തുറന്ന് നോക്കിയപ്പോഴാണ് മുറിയിലാകെ തീപടർന്നത് കണ്ടത്. ഇലക്ട്രീഷ്യനായ ഷാജു ഉടൻ തന്നെ വൈദ്യുതി കണക്ഷൻ വിഛേദിച്ചു. തുടർന്ന് മോട്ടർ ഉപയോഗിച്ച് വെള്ളം പമ്പ് ചെയ്ത് തീയണയ്‌ക്കുകയായിരുന്നു.
