കണ്ണൂര്‍ തോട്ടടയില്‍ ബസും മിനിലോറിയും കൂട്ടിയിടിച്ച് ഒരാള്‍ മരിച്ചു. ബസ് യാത്രക്കാരനാണ് മരിച്ചത്. അപകടത്തില്‍ 24 പേര്‍ക്ക് പരിക്കേറ്റു. ലോറി ഡ്രൈവറും ചികിത്സയിലാണ്. പരിക്കേറ്റവരില്‍ രണ്ട് പേരുടെ നില ഗുരുതരമാണ്. മംഗലാപുരത്ത് നിന്ന് പത്തനംതിട്ടയിലേക്ക് പോയ കല്ലട ട്രാവല്‍സിന്റെ ബസാണ് അപകടത്തില്‍പെട്ടത്.
അര്‍ധരാത്രി 12.45 ഓടെയായിരുന്നു സംഭവം. ബസിന്റെ പിന്‍ഭാഗത്താണ് ലോറിയുടെ ഇടിയേറ്റത്. കൂട്ടിയിടിക്ക് പിന്നാലെ ബസ് തലകീഴായി മറിഞ്ഞു. വലിയ ശബ്ദം കേട്ട് ഓടിയെത്തിയ പ്രദേശവാസികളാണ് പൊലീസിനേയും ഫയര്‍ഫോഴ്‌സിനേയും വിവരമറിയിച്ചത്. ഇനരെത്തുമ്പോള്‍ ബസിന്റെ എമര്‍ജന്‍സി വാതില്‍ ലോക്കായിരുന്നു. ഒരാള്‍ ബസിന്റെ മുകളില്‍ കയറി രക്ഷിക്കണേയെന്ന് നിലവിളിക്കുന്നുണ്ടായിരുന്നു. ഇയാളാണ് ബസില്‍ 24 പേരുണ്ടെന്ന് പറഞ്ഞത്. ഫയര്‍ഫോഴ്‌സെത്തി വാതില്‍ മുറിച്ച് മാറ്റിയ ശേഷമാണ് യാത്രക്കാരെ പുറത്തെത്തിക്കാനായത്. ഉടന്‍ തന്നെ ഇവരെ ആശുപത്രിയിലേക്ക് മാറ്റി. മരിച്ച യാത്രക്കാരന്റെ മൃതദേഹം കണ്ണൂര്‍ ജില്ലാ ആശുപത്രിയില്‍ സൂക്ഷിച്ചിരിക്കുകയാണ്.
