എല്ലാ വര്‍ഷവും ജൂണ്‍ 7 ന് ലോക ഭക്ഷ്യസുരക്ഷാ ദിനം ആചരിക്കുന്നു. ഭക്ഷ്യവിപത്തുകള്‍ ഒഴിവാക്കുന്നതിനും തിരിച്ചറിയുന്നതിനും നിയന്ത്രിക്കുന്നതിനും ബോധവല്‍ക്കരണം നടത്തുന്നതിനുമുള്ള പ്രവര്‍ത്തനങ്ങളെ പ്രചോദിപ്പിക്കുന്നതിനുമായാണ് ഈ ദിനം ആചരിക്കുന്നത്. നമ്മുടെ ശരീരത്തിന്റെ ഊര്‍ജം ഭക്ഷണത്താലാണ് ഉത്തേജിപ്പിക്കപ്പെടുന്നത്. ഇത് നമ്മുടെ ശരീരത്തിന് വളരാന്‍ ആവശ്യമായ എല്ലാ ധാതുക്കളും കാര്‍ബോഹൈഡ്രേറ്റുകളും പ്രോട്ടീനുകളും ഉള്‍പ്പെടെയുള്ളവ നല്‍കുന്നു. ജീവിതത്തിന്റെ അടിസ്ഥാന ആവശ്യങ്ങള്‍ ഭക്ഷണവും പാര്‍പ്പിടവുമാണ്. ഈ ഭൂമിയിലെ നിലനില്‍പ്പിനായി ഓരോ മനുഷ്യനും ഭക്ഷണം, വായു, വസ്ത്രം എന്നിവയെ ആശ്രയിക്കുന്നു.
ലോക ഭക്ഷ്യ സുരക്ഷാ ദിനം
ലോകമെമ്പാടുമുള്ള ഭക്ഷണത്തെയും ജലമലിനീകരണത്തെയും കുറിച്ച് അവബോധം വളര്‍ത്തുന്നതിനായി ജൂണ്‍ 7 ന് ഐക്യരാഷ്ട്രസഭ ലോക ഭക്ഷ്യസുരക്ഷാ ദിനം ആചരിക്കുന്നു. ഭക്ഷണത്തിലൂടെ പകരുന്ന രോഗങ്ങള്‍ കുറയ്ക്കുന്നതിനുള്ള ശ്രമങ്ങള്‍ ഈ ദിവസത്തെ മുന്‍നിര്‍ത്തി ലോകാരോഗ്യ സംഘടന തുടരുന്നു.
ചരിത്രം
2018-ല്‍ ജൂണ്‍ 7ന് ആണ് യുഎന്‍ പൊതുസഭ ലോക ഭക്ഷ്യ സുരക്ഷാ ദിനമായി പ്രഖ്യാപിച്ചത്. ഭക്ഷ്യജന്യ രോഗങ്ങളുടെ ബുദ്ധിമുട്ട് ലഘൂകരിക്കുന്നതിന് ആഗോള ഭക്ഷ്യ സുരക്ഷാ നടപടികള്‍ വര്‍ധിപ്പിക്കുന്നതിന് ലോകാരോഗ്യ അസംബ്ലി 2020-ല്‍ ഒരു പ്രമേയം പുറപ്പെടുവിച്ചു. അംഗരാജ്യങ്ങളുമായും മറ്റ് പ്രസക്തമായ ഓര്‍ഗനൈസേഷനുകളുമായും ചേര്‍ന്ന് ലോകാരോഗ്യ സംഘടനയും ഐക്യരാഷ്ട്രസഭയുടെ ഭക്ഷ്യ-കാര്‍ഷിക സംഘടനയും (എഫ്എഒ) സംയുക്തമായി ലോക ഭക്ഷ്യസുരക്ഷാ ദിന അനുസ്മരണത്തിന് സൗകര്യമൊരുക്കുന്നു.
പ്രമേയം
ലോകാരോഗ്യ സംഘടന (ഡബ്ല്യുഎച്ച്ഒ) ഇത്തവണയും ലോക ഭക്ഷ്യസുരക്ഷാ ദിനത്തിന്റെ പ്രമേയം പ്രഖ്യാപിച്ചു. ‘ഭക്ഷണ നിലവാരം ജീവന്‍ രക്ഷിക്കും’ എന്ന പ്രമേയത്തിലൂന്നിയാണ് ഇത്തവണത്തെ പ്രവര്‍ത്തനങ്ങള്‍. ‘സുരക്ഷിത ഭക്ഷണം, മെച്ചപ്പെട്ട ആരോഗ്യം’ എന്നതാണ് കഴിഞ്ഞ വര്‍ഷത്തെ പ്രമേയം. ആഗോള പങ്കാളിത്തത്തെ പ്രചോദിപ്പിക്കുന്നതിനായി ലോകാരോഗ്യ സംഘടന കാമ്പെയിനുകളും ആരംഭിച്ചിരുന്നു.
ഈ ദിനത്തിന്റെ പ്രാധാന്യം
ലോക ഭക്ഷ്യസുരക്ഷാ ദിനം മെച്ചപ്പെട്ട ആരോഗ്യം നല്‍കുന്നതിനും ദീര്‍ഘകാലാടിസ്ഥാനത്തില്‍ ഭക്ഷണത്തിലൂടെ പകരുന്ന അണുബാധ തടയുന്നതിനും ഇതുമായി ബന്ധപ്പെട്ട സംവിധാനങ്ങള്‍ പരിഷ്‌കരിക്കാന്‍ ശ്രമിക്കുന്നു. നാം കഴിക്കുന്ന ഭക്ഷണത്തിന്റെ സുരക്ഷ ഉറപ്പുവരുത്തുന്നതിനും ഭക്ഷ്യജന്യ രോഗങ്ങളുടെ ആഘാതം കുറയ്ക്കുന്നതിനുമുള്ള ശ്രമങ്ങളെ ശക്തിപ്പെടുത്തുന്നതിനുള്ള അവസരവും ഈ ദിനം നല്‍കുന്നു.
